Translate

我有我巨根

上星期四落柯打,星期五從日本寄出,星期二寄到,星期三到手,這盒 1:48 巾都算快入手了。星期三花了三個半鐘頭素組(包括打磨水口分及模線)後,它終於可以傲然站立在櫃頂了  見著這龐然大物,心中不禁為笨大呻笨:如果幾年前才開始推出的 UCHG 系列是用 1:48 比例而非 1:35 的話,這個巨巾會有幾多製作可能呢?!


下兩圖:一如盒面所言,果然至少有 375mm 高(18m  ÷ 48) 



下圖:模型還附有這本略有參考價值的書仔。


下圖:因為用速遞的關係,所以 Rainbow Ten 還送了架車仔過我揸 


下圖:與 1:60、1:100 和 1:144 的巾比較一下高度。


下四圖:Mega Size、PG、MG 和 HGUC 巾的重量比較。





下圖:連 PC 軟膠都有裝飾刻紋,都不能說笨大不用心設計這模型。


下圖:巨型的 PC 軟膠在設計上與一般用在 PG 和 MG 模型上的都有不同,令到完成品的關節相當穩陣。(拍照時把站也站不穩的 PG 巾拿上手,心中不期然感到笨大的進步。)


下圖:模型附有兩把這樣的分件工具把部件從膠框上拆下來,不過這兩把分件工具全都啤在膠框上。不知笨大叫初學者用甚麼工具去拆下它們呢 


下圖:說明書有教人怎樣用這把分件器,不過我還是用了模型剪去剪件。


下圖:笨大又一籮柚痕的創舉:先啪起兩底連膠框部件之後才拆下膠框中個別零件。我就沒有這樣做了,因為永遠會有一些部件還是啪起之前才容易打磨水口和分模線嘛。

25 則留言:

  1. 幾多銀両?
    [版主回覆03/13/2010 09:24:00]¥10940 

    回覆刪除
  2. 哇  你在多伦多都已经拿到了~    温哥华现在连7剑00都没有哦
    [版主回覆03/13/2010 09:28:00]速遞的貨太貴,一般商舖是賣不出的。正正是遲買平兩舊的道理 

    回覆刪除
  3. 嘩~~~~~咪成八舊幾,連運順咪成千?香港真係太幸福啦!下次番香港入多隻,一對咁放響屋企門口,真係引死鬼佬呀!
    btw!你想噴咩色呀?
    [版主回覆03/15/2010 07:06:00]如果我打算在香港買就不會現在就入貨啦。這個巨型模型帶上飛機也相當麻煩,而且我還有更重要的東西要帶上機,所以現在就買。反正現在買或一年後才買運費都是一樣,價錢也不會平太多,那又何必等呢?!

    回覆刪除
  4. 呢d巨巾真係唔係好岩我,都係細艾野好d…
    [版主回覆03/15/2010 07:08:00]齋啪起當公仔攬住來瞓都啱掛?!

    回覆刪除
  5. 我一直都感到疑惑,點解笨大唔出 1/60 而出1/48。 因為嫌1/48太大,如果佢出1/60 ge話我都會入手的,但睇完堂哥個比較身高圖後,原來隻高1/60 少少,咁就可以考慮入啦
    [版主回覆03/15/2010 07:10:00]其實我都好意外它比 PG 巾高不了很多 

    回覆刪除
  6. 我見ya大同毫三子都砌得幾好玩.... 要上色的話就要準備多幾支油了.
    [版主回覆03/15/2010 07:12:00]YA 大話用了四支油作底色,所以我都係用噴罐上黑色做底色就算了。

    回覆刪除
  7. 估唔到地理堂兄對大巾都有性趣
    講真, 我以為香港會因為太大-->滯銷-->劈價呢三步曲
    點知原來好賣到要加價....睇黎將來要睇下我同佢有冇緣了~
    [版主回覆03/15/2010 07:14:00]我只驚佢好賣到會出渣古,咁就又唔見錢啦 

    回覆刪除
  8. 我對架車仔有興趣多d
    [版主回覆03/15/2010 07:15:00]我幅相大咋,架車真係好細架的。

    回覆刪除
  9. 我都係對"車仔"有興趣
    [版主回覆03/15/2010 07:16:00]據聞是非賣品來的 

    回覆刪除
  10. 我唔明點解Bandai以今時今日的技術, 仲要留返幾條大夾口俾玩家做乜!
    [版主回覆03/15/2010 07:24:00]我仔細看過小腿和手臂部份,相信原因是錢作怪。如果要避開夾口是辦得到,不過外裝甲不會受力,需要有內骨去連接關節位及讓外甲附上去。而且以 1:48 的比例,打磨那些夾口相對容易,問題也不是很大。

    回覆刪除
  11. 大比例,更方便做得仔細逼真寫實... 擔定凳仔等睇你示範十成功力。
    [版主回覆03/15/2010 07:42:00]不然不然,大比例在塗裝上可以大玩舊化,但礙於模型只有表面仔細,鬼祟位完全欠缺細節,從窿罅位是可以輕易看見內裡單薄的設計,所以這東西與寫實逼真差以千里。大人不必期待 

    回覆刪除
  12. 我有d覺得笨大今次出1/48是有心試買家的應受性,反應好的話,之後會再出detail版1/48,殺fans一頸血
    [版主回覆03/15/2010 07:47:00]如果要 detail 版的話倒不如出 PG 2.0,我覺得反應好的話會出其他機體。畢竟就算是同比例但去到另一個價位的話,今趟測試反應的結果也不能加諸於更貴的 1:48 精密版上。

    回覆刪除
  13. 這件1/48的高達簡單易砌, 無疑是想吸納少砌開模型的那一眾市場, 而又有原本高達fans 的市場. 所謂大小通殺.
    [版主回覆03/15/2010 07:48:00]從說明書可見,笨大確有這個打算。

    回覆刪除
  14. 期待大改啊!!!
    [版主回覆03/15/2010 07:49:00]不會大改囉,只打算改成 G1 便算數 

    回覆刪除
  15. 哩隻巨根的確抵玩 , 我都搵 friend 幫手入左只不過仲未交收 !
    [版主回覆03/15/2010 07:51:00]咁大盒,交收都幾煩,對方可能不易帶返公司等放工後去同你交收。

    回覆刪除
  16. 香港(我屋企)寸金尺士,我都係同佢無緣了……
    [版主回覆03/15/2010 11:48:00]話過你知呀,你屋企個玻璃櫃頂層同底層都可以放得入佢架 

    回覆刪除
  17. 你可唔可以同我老婆講句呢,謝謝。
    [版主回覆03/16/2010 10:54:00]講句無所謂,反正要瞓廳那個不會是我 

    回覆刪除
  18. 連你都人左貨,睇黎呢隻野都幾好賣 wor !! ~  不過佢既外型可能要執少少會更型仔 ~ 
    [版主回覆03/16/2010 10:52:00]其實要執外形會幾大工程,例如加長手臂的話,如 MG 般加一兩毫米跟本就杯水車薪止不到咳;加到成一厘米就要磨餐死補到發莓。要大搞還是用 1:144 版本好!

    回覆刪除
  19. 咦!拍埋隻PG一齊企只係高一個頭位,又無想像咁高喎  .....
    但大人已經批o左,入硬咧!不過要等佢跌o下價先 ~
    [版主回覆03/16/2010 10:48:00]據聞巨巾在香港幾好賣,等跌價會比一般長。不過你還是專心砌你部炮古,等下無妨 

    回覆刪除
  20. 仲爭咗隻 1:35 Jumbo Grade !
    [版主回覆03/16/2010 10:45:00]Jumbo Grade 隻巾咁醜樣,好煞風境啫!

    回覆刪除
  21. 架 EMS 車仔好正
    [版主回覆03/16/2010 10:44:00]你又係咁講嘅?!真係無乜特別的一架車咋喎!

    回覆刪除
  22. 個磅乜唔係愛黎製毒架咩????? 愛黎磅巾好似嘥咗d 喎...
    [版主回覆03/16/2010 10:43:00]哎吔,啲巾唔夠毒添 

    回覆刪除
  23. Besides超嫂, 有機會都要幫我向老婆求請
    [版主回覆03/16/2010 10:42:00]幫你求請無所謂,跪玻璃同頂痰罐就要你自己做了 

    回覆刪除
  24. 佢又唔會咁暴力, 睇粵語長片咩... 但一嘢掃櫃就真係有可能
    [版主回覆03/16/2010 10:56:00]頂痰罐原來好暴力架,真係要過來人先知道 

    回覆刪除
  25. 睇多次個比例,其實隻巨根同PG應該係咪差唔多呢?只要PG加番長手腳已經係1/48比例啦呱  ......
    [版主回覆03/18/2010 09:21:00]PG 有內骨,加番長手腳談何容易,還是科水買隻巨巾砌簡單得多 

    回覆刪除