這個週末北美洲又開始使用夏令時間，所以星期日一覺醒來有點春夢乍醒的感覺，只嘆句美好時刻不可留，一日就只剩下那廿三小時矣。雖然無情白事少了一粒鐘，但砌模型的時間是不會因此縮短的。這個週末甚有興緻，所以把早前收到又黐起部份的 Stingray 打磨一番。查實嘛，應該說是打磨九番才對，因為這部長谷川出的 Ma.K. Lunadiver 實在有不少夾口，好在夾口附近表面刻線不多，不必補完磨完後要重新刻過表面的凹線。
下圖：這部與巨巾差不多價錢的 Stingray 細了巨巾幾個碼，也不可謂笨大的出品唔抵玩！
下圖：Stingray 的夾口重災區（其實還未補完，要遲下噴了灰肯定表面沒有瑕疵才可以再黐再磨再補！）
其實部 Geara Doga 與上次所見的差不多，只不過這個星期我把所有連接位做好了，現在背後的重裝就不必倚靠寶貼膠紙去試造形，由此亦可以擺出好一點的姿勢。不過仍有漫漫長路呢！
也不知是誰有此遠見，把這部 1:48 G30 說成是「巨根」。果然，在激情過後就只會留它在高閣上獨自哭過夠。但也只可怪我太過有情有義，所以還是抽了幾分鐘時間替它的夾口和分模線加了一點畢地。想來當我見夠新人笑之後，它的畢地也應該乾透可以打磨一下了。
此與模型無關，只不過今晚飲完了最後一支啤酒後，明天要去買過一打，否則乾吔那餘下的十多粒話梅都幾甘下！
啤酒都要用微波爐叮一叮?
回覆刪除施主, 酒肉穿腸過, 佛祖心中留, 阿門!
[版主回覆03/17/2010 04:50:00]我只係用微波爐來反映出我件睡衣係乜樣啫
觀後感係：就黎有好多正野睇喇 !! ~ 有時飲些少啤酒確係爽架 ~
回覆刪除[版主回覆03/17/2010 04:52:00]我發覺飯後飲會好一點，飯前飲（鬼佬飲法）我就一定上腦。
哈哈, 半介啤酒嘅我依家多數飲一小杯紅酒, 應該話一小杯紅酒伴我兩個半小時的模型製作... 部 Geara Doga 好有睇頭!
回覆刪除[版主回覆03/17/2010 04:54:00]屋企飲紅酒我真係唔掂，開了一支擺到變酸都未飲完
咁大條夾口，見到都怕
回覆刪除[版主回覆03/17/2010 04:57:00]夾口只係長但不算高低級嚴重，所以應該不難打磨的。尤其是打磨過 1:144 G30 後更加無理由話 1:48 G30 難搞。
食話梅好，怡神安胎...
回覆刪除Stingray 底部電線是半圓的一體啤模，會否剷走重做全圓？
[版主回覆03/17/2010 05:01:00]話梅安胎？！你真係蝦我未生過仔嘞！
剷線這問題還沒有考慮到，暫時也只做住基本工序先。
Geara Doga 好有氣勢
回覆刪除"長谷村" 盒嘢就..........
[版主回覆03/17/2010 05:03:00]盒 Stingray 比 Falke 已經易搞了，試想想不必先油好個座艙才封艇就可知道了。
點解Geara Doga對鞋有d馬蹄feel…
回覆刪除[版主回覆03/17/2010 11:23:00]因為我的確想做一雙馬蹄嘛。廿年前當我第一次見出淵裕的 Geara Doga 設計時，就覺得畫上一雙腳似馬蹄。前年出的 HGUC 版模型反而沒了這個感覺，所以當我設計它一雙腳時，畫稿就是對著一幅馬蹄相來畫。然後當我用泥膠撚隻腳的雛型時，才發覺要有馬蹄感覺的話一雙腳掌就只可以偏短，但最後看順眼了才決定採用現在這設計。不過現在的模樣還未完成的
我沒什麼飯前或飯後喝啤酒的規則. 我通常是飯前喝的, 但不是一口喝光. 開飯時先喝一些, 然後就邊吃邊喝. 一般來講, 還沒吃完就已經喝光.
回覆刪除p.s. 我卻不是常喝啤酒. 送飯的較多是soft drink或清水.
[版主回覆03/17/2010 11:34:00]我通常喝啤酒是外出跟同事食飯之時，一坐落椅就叫啤酒飲，而飯後侍應永遠只會問你飲不飲咖啡而不是啤酒，所以我才有飯前或飯後飲啤酒之說吧。不過這樣飲的話，未開始上菜我已經上腦，但這兩星期在家中飯後砌模型時飲又沒有事，更令我覺得還是飯後喝好
既然咁多火頭,不如砌埋兩隻裝甲服啦....
回覆刪除[版主回覆03/17/2010 11:37:00]我啲係虛火，而且兩隻裝甲服沒有甚麼新鮮感，不必太早開工呢
1/35裝甲服唔同玩法, 砌過你就知
回覆刪除[版主回覆03/18/2010 10:08:00]原來如此，過幾日開工先！
真識嘆 ! 話梅啤 ~
回覆刪除[版主回覆03/18/2010 10:07:00]台灣人的一大發明！
啤酒就梗係食飯時或食飯後飲啦！尤其是打邊爐果時！飯前空肚飲好傷胃架~~~~~
回覆刪除[版主回覆03/18/2010 09:34:00]此道你都經驗豐富，你講一定無錯
咁快夏令時間
回覆刪除[版主回覆03/18/2010 09:32:00]真係起身時都未天光
咁多火頭....
回覆刪除唔怪得要飲啤酒下火...
[版主回覆03/18/2010 09:31:00]春天寂寞嘛，咪要不斷在春風之中放火燒自己囉
其實件Ma.K. Lunadiver適唔適合我依ｄ Ma.K新手砌？ 這造型實在好吸引，但係見個價又唔敢買，買左又怕唔敢砌=.="...... Geara Doga頭部既造型瀟灑左，期待進度！
回覆刪除[版主回覆03/18/2010 09:29:00]無話所謂唔敢砌嘅，不過以這個價錢、長谷川的作風和模型中另有兩個馬桶，這部 Stingray 的確不是 Ma.K. 的入門製作。有興趣的話可以向 Wave 的 S.A.F.S. 和 Snake-Eye 埋手，比例較大和組裝較近似大家熟悉的笨大風格。如果想試 1:20 的舊化的話，S.A.F.S. 的玩法比 Snake-Eye 更多。
睇見呢隻巨物就諗起「近藤版」的 THE-O設計，睇o黎若然呢隻 Stingray 唔砌，用o黎做 Parts 都有幾大用途o下喎 ~
回覆刪除P.S.隻巨根有你雙伴又點會悶，佢重要等你好好地好好地咁修理o下佢哩 ~
[版主回覆03/21/2010 00:06:00]你都好富貴喎，諗住用隻 Stingray 來做 parts！不過講真，Stingray 的件很大，用來做 parts 其實未必好大用。
我也很喜歡飯前飲啤酒, 因為在微醉時吃飯是最開心的.
回覆刪除[版主回覆03/21/2010 00:03:00]你老婆煮啲餸不至於好難食呱，你要醉住黎食
我這一個星期……你就好啦……
回覆刪除[版主回覆03/21/2010 00:02:00]能者多勞，捱下啦，你得嘅！
期待你的1/48高達 ﹠ Stingray機...！！
回覆刪除[版主回覆03/25/2010 09:08:00]應該明年可以完成的