Translate

中秋馬桶

星期五在公司無意中發現星期六晚某戲院有一場新劇場版的 Evangelion 放映,誰不知中秋晚去到戲院得個桔,悻悻然歸家,無聊下影了這幾張相。相中 Snake-Eye 的「地台」是一個迷你月餅盒,應節之餘因為馬桶腳內藏了磁石,所以這個金屬月餅盒可以牢牢黐住個馬桶實在太方便了!



過去幾日趕巾之餘,亦抽空砌砌部馬桶,免得月尾趕到甩轆。這幾日主要集中搞焊接的部位;以前整這效果,一定用混合畢地,今次就完全沒有用它,主要倚靠一支強力膠水。(其實早前砌部 Falke 的焊接位都是用這方法。)這支美國佬出的 Pro-Weld(個名真係改得合適過合適)雖然少聽香港模人提及,但我相信一定有不少人用過,因為它在這邊出了多年亦很普遍。我曾試過用田宮綠蓋膠水去溶膠,但效果遠不如 Ambroid 好。幼膠條只需用它掃一兩次,膠水就可以軟化了膠條,之後便可以用工具刻出焊接紋;又或者用這膠水接合兩件零件時,刻意讓多餘的膠水從接縫中逼出來,趁未乾硬時用工具刻出焊接紋來。



下兩圖:用膠水從接縫中逼出來然後刻出焊接紋的效果


下兩圖:用 Plastruct 的幼膠條先圍了邊,後用 Ambroid 軟化了膠條再刻出焊接紋的效果。


下兩圖:猶記得舊版 SF3D 部份護膝兩旁都有個方形焊接紋,以前日東出得不好以至差不多必定被製作者磨去。而 Wave 的版本更完全沒有任何焊接紋(長谷川的 Falke 亦然),故此手痕下加了上去。但刻得不好,遲下再掃些 Pro-Weld 去軟化舊焊接紋然後再刻過。(用混合畢地造的話就要磨去舊焊接紋從零再做起了!)

19 則留言:

  1. "用膠水從接縫中逼出來然後刻出焊接紋的效果" 真係好正! 有機會試下先
    [版主回覆10/05/2009 11:14:00]不過要大比例先好試喎,PG 比例身上都未可以有焊接紋。

    回覆刪除
  2. 好介紹~
    [版主回覆10/05/2009 18:58:00]分享一下經驗啫 

    回覆刪除
  3. 佢話連abs 都痴到喎~ 有冇試過
    [版主回覆10/05/2009 19:00:00]試過,好得添!強過黃蓋日本出那支「ABS 用」!

    回覆刪除
  4. abs 都痴到?
    [版主回覆10/05/2009 19:01:00]無問題,照黐,尤其是它可以滲入夾縫中。

    回覆刪除
  5. 真係好正喎 . 唔得喇, 我真係中咗馬桶毒喇, 我聽日要去買喇
    [版主回覆10/06/2009 06:35:00]希望還有貨,上星期 lastman  哥才 $21X 入了。

    回覆刪除
  6. 昅下hk 有冇先
    [版主回覆10/06/2009 06:33:00]有可能包裝是一個大透明膠樽內放了這支膠水。BTW,它的毒性不比 AA 膠低,要在通風環境下作業。

    回覆刪除
  7. 哩個做得好!  死啦, 望著你整我個腦諗緊點樣改佢d關節....中毒啦.... 隻30歲巾呢?
    [版主回覆10/06/2009 06:30:00]唔駛諗改關節啦,佢不會做到一字馬又不能擰轉身,佢嘅動作與「有型」係絕緣嘅!
    G30 在作局部打磨等畢地乾,所以才有時間搞第二啲嘢!

    回覆刪除
  8. 迷你月餅盒....禁甪幾迷你啊??^^
    如果加埋地理堂兄你ge舊化就so good
    [版主回覆10/06/2009 06:25:00]個月餅盒迷你,連個月餅都迷你。個盒僅可放入這四吋高的馬桶!

    回覆刪除
  9. 個d紋,好有点焊嘅質感
    [版主回覆10/06/2009 06:23:00]完全是抄廿多年前日東的模型!

    回覆刪除
  10. 傳說中既燒膠料大法呀!!!
    [版主回覆10/06/2009 06:23:00]傳說中既燒銀紙大法吧 

    回覆刪除
  11. 應該係"燒膠焊"大法. 
    [版主回覆10/06/2009 06:22:00]怪唔之得要用 Pro-Weld 

    回覆刪除
  12. 做焊紋的技術很好。
     
    但頭蓋本身略圓,必須靠倒模,所以整個上蓋就該 一體倒模 而出,不應分成 兩件 然後由燒焊接合。其他的焊紋都有點莫名其妙。
     
    當然,「唯美至上,何須合理」是模界金句。我還是快些閃人好了。
    [版主回覆10/06/2009 06:18:00]護膝的焊紋的確是莫名其妙,我加上去只為了歷史原因吧! 而頭蓋的焊紋則有另一個解讀。下圖是三張馬桶的資料卡,分別是第一個元祖馬桶(S.F.A.S,左上)、宇宙型馬桶(Fireball,左下)和 Fireball SG(右)。橫山宏在元祖馬桶背後加個推進器,頭頂加條天線就成為 Fireball;然後在 Fireball 背後外露的機件上加個殼就成為 Fireball SG。三代馬桶的頭蓋是完全一樣,但我上面這部 Snake-Eye 是 Fireball SG 的變種,換了天線和換了一個有偵察器之類的頭蓋。故此我才把頭蓋那凸起的偵察器理解成後加之物。

    回覆刪除
  13. 其實係咪有哩套嘢嘅片架? (如動漫畫之類...) 以佢哋嘅科技, 會唔會有焊接紋呢???
    [版主回覆10/06/2009 10:18:00]無動漫畫架,係廿幾年前橫山宏係 Hobby Japan 中自製模型情景的故事,但八六年他因與 Hobby Japan 鬧翻而被迫在九十年代末易名為 Maschinen Krieger ZbV 3000 的模型系列。 以前日東出的模型係有焊接紋嘅!

    回覆刪除
  14. 點解要加磁石係脚板? 想吸係個雪柜度? 定係又有後着.
    又,睇怕我都要買支強力膠水睇吓門口..
    [版主回覆10/07/2009 07:27:00]因為它上重下輕,與其用原子灰填滿雙腳掌,倒不如加兩粒金屬,首選當然是磁石啦!

    回覆刪除
  15. 厲害!!又上了一堂
    [版主回覆10/07/2009 07:28:00]言重了 

    回覆刪除
  16. 又來上堂先!!
    [版主回覆10/07/2009 07:31:00]波哥你咪同細佬講啲咁嘅衰嘢先得架,我受唔起架。準確啲講,係我後欄受唔住,你上其他人唔好搞我啦!

    回覆刪除
  17. 我記得嗰時哩款模型賣得好貴吓...後來郡是又出咗特裝機兵, 個style 都有d似樣; 當時我哩d 窮學生就走咗去砌特裝機兵... 所以我成個砌模型嘅生涯中都冇砌嗰類款模型.....只係知道有, 但就好陌生....原來佢嘅歷史係咁嘅....
    [版主回覆10/07/2009 07:34:00]無獨有偶,你這番話隱約就是我介紹 Ma.K. 中的話! 見 第一段字 。

    回覆刪除
  18. 咦!!! 原來可以咁玩! 咁下次我唔用AA膠了!!
    [版主回覆10/08/2009 18:48:00]它不能代替 AA膠,因為它揮發得很快,用法只可以在夾縫中滲進去黐件。

    回覆刪除
  19. 好利害的焊接技術,請受小弟一拜
    [版主回覆10/08/2009 18:46:00]言重了,只是小實驗矣!

    回覆刪除